Blómabúð Akureyrar
Sagan
Verslun á Akureyri með blóm og gjafavöru á sér langa sögu sem nær allt aftur til ársins 1945. Þá opnaði Kaupfélag Eyfirðinga litla blómaverslun við Ráðhústorg og voru þar eingöngu seld blóm frá Gróðrarstöðinni Brúnalaug í Eyjafirði sem KEA stofnsetti 1937. Árið 1946 var blómaverslunin flutt í Hafnarstræti 89 eða gamla Teríuhúsnæðið sem hýsir Hamborgarafabrikkuna þegar þetta er skrifað og tók þá Arnór Karlsson við deildarstjórastöðu verslunarinnar. Arnór breytti og bætti verslunina með meira blómaúrvali frá Hveragerði, ásamt úrvali gjafavara til fegrunar fyrir heimili bæjarbúa. Árið 1956 fluttist blómabúðin í leiguhúsnæði í Hafnarstræti 96 þar sem Arnór sá um verslunina til ársins 1965 en þá tók Ólafur Axelsson við af honum. Árið eftir hætti Kaupfélagið rekstri verslunarinnar, meðal annars af húsnæðisástæðum.
1966 – 1997
Arnór heldur síðan verslunarrekstrinum áfram í 31 ár eða til áramóta 1997 undir nafninu Blómabúðin Laufás.
1997 – 2001
Hjónin Sigmundur Rafn Einarsson og Guðbjörg Inga Jósefsdóttir hefja rekstur að nýju í Hafnarstræti 96 og breyta nafni verslunarinnar í Blómabúð Akureyrar.
2001 – 2016
Árið 2001 kaupa hjónin Jóhann Gunnar Arnarsson og Kristín Ólafsdóttir Blómabúð Akureyrar og starfrækja hana til 1. febrúar 2003. Þá kaupa verslunina hjónin Anna Hulda Hjaltadóttir og Ólafur Þorsteinn Ólafsson, ásamt hjónunum Gunnhildi Ragúels Halldórsdóttur og Hafþóri Viðarssyni. Þann 1. febrúar 2006 kaupa þau hjónin einnig Blómabúðina Akur, Kaupangi við Mýrarveg, en sú verslun var fyrst opnuð 1974. Breyting varð á eignarhaldi í nóvember 2015. Þá hætta þau Anna Hulda og Ólafur rekstri en núverandi eigendur, Gunnhildur og Hafþór, halda uppi merkinu og gera enn í anda Arnórs Karlssonar sem lagði metnað sinn í að bjóða fjölbreytt úrval fallegra blóma og gjafavöru við hvers manns hæfi – vörur sem fegra heimili þitt.
